الهواوي

**العاصف** الخميس نوفمبر 13, 2008 5:56 am

بســم الله الـرحمــن الرحيــم
السلام عليكــم ورحمـة الله وبركاتــة ،،

يقال ان شايب اسمه حمدان كان "هواوي " مايشوف بنت الا ينفتن فيها "

وكان طيب وحبيب وشاعر.. وكانت فيه بنت من نفس القبيله راعيت مقالب وعفيفه لاكن تحب الضحك وشاعره

قالت في نفسها ليش مااروح للشياب امزح معه شوي واوسع صدري

واشوف وش رده فعله وارجع .. قامت وراحت للشايب وسلمت عليه وقالت كيف حالك ياشايب ؟؟

رد السلام وقال بخير الحمد لله وفجأه عطته ظهرها وراحت ولا أستأذنت ومشت وخلته

عاد الشايب ولع من حركتها وكتب فيها كم بيت يستعطفها فيها وبيقول انها ذكرته بايام أول

و بالماضي وقال لها انها اذا ماعطه وجه لحق باخوه حمود الي في قبره

وقال هذه الابيات ..يقول الشايب:-

يا بنت خوذي خاطري وارحميني....لا تجرحين العود بعيونك السـود

غضي نظرك وغطي الوجنتينـي.....لعل يومٍ جدد الجرح مـا يعـود

يوم انتهى مع مرمسات السنينـي.....جتني صواديفه على غير مقصود

باول شهر عشره نهـار الثنينـي....حمدان مروا به على جنازة حمود

البنت كانت تقصد من استفزازه انها تجاريه في الشعر وترد عليه والمسكين ما كان يدري انها شاعره

فردت عليه وهزأته تقول:-

يا شايب الرحمن وينـك ووينـي....عزي لحالك قدمك الباب مسـدود

قلبك عطوف وجاه قلـبٍ متينـي.....والبنت ما تشفق على مغازل العود

حبل الرجا مقطوع بينـك وبينـي.....مثل الغليث اللي رعا قلبه الـدود

اقفى شبابـك والعـرب مقبلينـي.....يا عود ما يرجع من العمر مفقود

حطمته يوم قالت له انك عود وان الشباب ما يرجع وان ما فيه امل تعطيه وجه حس العود انه تورط وقال كم بيت

يقول لها صدي عني وانه ما يبي الغزل بعد ما وصل عمره ثمانين سنه

يقول حمدان :

يا بنت صـدي بالعيـون الظليلـه....لا صد عنـك الله نهـار القيامـه

مالي ومالك يالفـروع الطويلـه....لو فيك من رسم البـداوه علامـه

يابنت مـا لـي بالثمانيـن حيلـه....اهدف كما تهدف على البير قامـه

اقفى شبابي والدهر شفـت ميلـه....يالله حسـن الخاتمـه والسلامـه

اعطيك موجز والبضاعـه قليلـه....واخذت لك من صافي الماء سنامه

بعد فتره مرته مره ثانيه وردت عليه السلام واستفزته وراحت وخلته ولع الشايب مره ثانيه وقال ليه ما ابين لها في

كم بيت انها بتشيب مثلي واني رجال طيب وان الناس تنصاني ومعروف بالكرم واني ماابى منها غير التحيه والترحيب

يقول حمدان :

يا بنت ما جاس الكبـر والخشونـه...وعادت شباب اليوم يجفل من الشيب

ياسرع ما وبلـك تمـزع مزونـه....يالفاتنـه يـا ام الثمـان الرعابيـب

يا بنت مـا بينـي وبينـك مهونـه....كلمة شرف نبي تحيـه وترحيـب

الله مـن عـودٍ ثقيـلـه طنـونـه.....ينصاه راع المشكلـه والمواجيـب

على الكرم والديـن نفسـه حنونـه.....تلقاه بالاجـواد شـرق وتغاريـب

جهز الابيات وارسلها مع عجوز ووعد العجوز بهديه اذا وصلت الرساله لها

راحت العجوز وعطت البنت الابيات شافتها البنت وقفلت على العجوز في غرفه

وقالت مثل ما جيتي بابياته ترجعني بابياتي العجوز مسكينه قالت طلعيني ولا ابي

منكم شي الله لا يعودكم انتم واوراقكم. ردت البنت ابيات اقوى من الاولى واكثر تحطيم للشايب

تقول البنت :

العود عود وطايحـاتٍ سنونـه ..... من كثر ما يرقد على جرة الذيب

عودٍ مهرقل والعرب ما يبون.... ياعود ما لك في طويل المراقيب

اقفى شباب العود راحت حتونه.....مثل اليتيم اللي بكا ما له مجيب

جداه ينثر دمعـة ٍ مـن عيونـه....غريق موجٍ ما لقا له مقاضيـب

ارجو ان تنال استحسانكم ,والمعذره عن كل مقص وتقصير,,والسلام عليكــم ورحمـة الله وبركاتــة ،،
[b]